१० फिलिपिन्स नागरिकांवर गुन्हा

दिल्ली येथून वाशी सेक्टर-९ येथील नूर-ए-मस्जिदमध्ये धार्मिक कार्यक्रमासाठी आलेल्या फिलिपिन्स नागरिकांमुळे नवी मुंबईत करोनाचा फैलाव झाल्याचे आढळून आल्याने वाशी पोलिसांनी १० फिलिपिन्स नागरिकांवर गुन्हा दाखल केला. दिल्ली येथून आलेल्या १०पैकी तीन फिलिपिन्स नागरिकांना करोना विषाणूची लागण झाली असतानादेखील त्यांनी प्रशासन आणि पोलिसांना याबाबत कोणत्याही प्रकारची माहिती न देता वाशीमध्ये वास्तव्य केले होते. त्यामुळे त्यांच्या संपर्कात आलेल्या मशिदीतील मौलवीसह काही कर्मचारी व नागरिकांना करोनाची लागण झाल्याचे आढळून आले आहे.

मार्चमध्ये दिल्ली येथील निजामुद्दीन येथे आयोजित करण्यात आलेल्या धार्मिक कार्यक्रमात फिलिपिन्स देशातील नागरिक मोठ्या संख्येने सहभागी झाले होते. दिल्ली येथील कार्यक्रम संपल्यानंतर १० मार्च रोजी तबलिग जमातीचे १० फिलिपिन्स नागरिक वाशी सेक्टर-९ येथील नुरुल इस्लाम ट्रस्टच्या नूर-ए-मस्जिदमध्ये धार्मिक कार्यक्रमासाठी आले होते. यावेळी सर्व फिलिपिन्स नागरिक हे १६ मार्चपर्यंत नवी मुंबईत वास्तव्यास होते. त्यातील ६८ वर्षीय व्यक्तीसह तिघांना करोनाची लागण झाली असतानादेखील त्यांनी स्थानिक प्रशासन अथवा पोलिसांना कुठल्याही प्रकारची माहिती दिली नाही. त्यामुळे त्यांच्या संपर्कात आलेल्या वाशीतील मशिदीच्या मौलवींसह इतर अनेकांना करोनाची लागण झाली.